Minister hlui Lalruatkima chuan, "Kan Zoram hi kan thlahte chenna tlaka buatsaih leh ven him a tul tak zet a, Hnam anga kan din chhuahna turin kawng kan sahzau a ngai a ni. Kan pasaltha Martarte thisen avangin Mizo hnam chu zahawmah kan lo awm ta a. Mizote thinlungah Hnam tana Martarte an nung reng dawn a ni," a ti.

MNF Tresurer chuan, MNF-in sulhnu pawimawh tak tak a nei teuh thu sawiin, India ramah hian Peace Accord ziah a lo ni nual tawh hlawm a, heng zinga hlawhtling ber chu "Mizoram Accord June ni 30, 1986" hi a ni. MNF underground hruaitu, Pu Laldenga leh Pu Zoramthanga leh hruaitu hmasate ngaihtuahna fel vang a ni a, Mizo mipui inpekna leh tanrualna avanga te, ram leh hnam tana martar te vanga hlawhtling a ni. MNF Founder President-in min kalsan lai khan, India Prime Minister VP Singh chuan, Laldenga hi India in a la mamawh a ni mai lova, khawvelin a la mamawh a ni. Remna thuthlung tihlawhtlingtu a ni a, India ram a awm chhung chuan Laldenga hi kan theihnghilh lovang, a ti hial a ni. He Accord hlawhtling tak avang hian Pu Zoramthanga CM laiin Peace bonus sum thahnem tham tak kan dawng hial a. MNF leh India sorkar inremna a ni mai lova, khatih laia Mizoram sorkar aiawhte nena inremna a ni bawk, a ti. 

Lalruatkima chuan Memorundam of Settlement hian Zofate tan rahchhuah tha tam tak a nei a- Bill No 89 of 1986 ah, Constitutional Amendment 53, Article 371(G) dahbelhin, Mizoram chu Statehood-a puan kan ni a, Central University (MZU) July ni 2, 2001 ah hawn a ni bawk. Tin, Gauwhati High Court Mizoram din a ni tawh a,  MINECO – Mizoram New Capital Complex ropui tak din a ni a, a dinna atan  Aizawl khawpui laili lai tak atangin Assam Rifles sawn chhuah an ni, a ti a, Serlui B Hydel project, Durtlang to Bawngkawn kawng zauh  ,Chaltlang to Chanmari kawng zauh te, Bawngkawn via Ramhlun Chanmari Road zauh te, Millenium Centre, Aijal Club, CH.Chhunga Bus Terminal, CH.Saprawnga Truck Terminal te hi MNF-in a sual chhuah vek a ni, a ti a, Hei hi thangthar ten kan hriat a tul a ni, a ti bawk.

MNF Treasurer chuan, tuna kan sorkar hrawn mek hian FCAA, 2023 hmangin ZPM sorkar chuan kan ram an  hralh a, ZPM sorkar adin tirh phat atangin an kutchhuak ni miah lo Lengpui Airport, ZMC Falkawn leh Serlui B Hydel project te hralh tumin an rel nghal a nih kha. Vai mihausa Inneih a hmanpui denchhenin an zuar kual an zuar kual a, mahse tun thleng chuan hralhna an la hre ta chuang lo a ni, a ti. 

Mizoram hian hmasawnna Development kan tih Infrastructure ropui tak tak hi kan awtin kan duh ngei mai, kan ram, kan hnam leh kan sakhua a him dawn em tih ngun taka ngaihtuah chungin, a that dawn loh emaw a him dawn lo a kan hriat chuan hmanhmawh mai lo tura kan ngaihtuahna kan hman a tul tak zet a ni, a ti bawk.

Mizo Nationalism hi kan innghahna Lungphum a nih chhung chu kan him dawn a. ZPM sorkarah hian kan ram hi a thlaphang a, a rum mek a, Bairabi Rail station a Hitachi tam tham zet rawn phur luh a ni te khan kan ram rohlu- Thing leh Mau, Nungcha engtin nge an suasam ang tih ngaihtuah ngam pawh a nih loh thu a sawi bawk.

Tin, kan inhung bikna Article 371G ngei pawh sum leh pai, hausakna duh luat vangin an halral thil hlan atan an hmang mek a, kan Hnam Pa Pu Laldenga’n “Kan lunglen thu chu thudang ah dah ta ila, Arona hovin Sebawngno an lo chhun hi kan hlau a ni” a tih ang khan, vawiina kan sorkar kalphung en hian Zoram khawvar thlen tir chu kan hlat ta hle a ni. Chuvang chuan Zoram mipuite hian Mizo Nationalism hi Development maicham ah halral thil hlan atan kan hlan ve a thian loh thu sawiin, kum 2028-ah Zoram kalphung siam tha leh turin MNF chu Hnam rilru pu tlat chunga  a sawrkar leh ngei a tul thu a sawi bawk.

Dinhmun khawngaihthlak taka ding mek, CSS Employees ten Chhungkaw pa ber hnenah pangchang takin an mamawh thlenin, an nuar a. Mahse, fate ṭap thlem tur sawrkar awm lo ang maiin, vauna leh thupek khauh pui pui an dawng a. Dan anga dah ngheh ngiattute chu banah an vau let zawk a ni. An chungchang ngaihtuaha Cabinet Meeting tur zawk awm tak, chu ni 18.9.2025-khan ZPM Coordination Committee an han thukhawm daih thung a. Chief Minister thusawi leh Adviser to CM thusawi inkalh avangin ngaihdam dil hial a ngai te kha Sawrkar mumal loh zia ti langtu a ni, Lalruatkima chuan a ti bawk.